တတိယဘာသာစကား

မိခင်ဘာသာစကားဖြစ်တဲ့ မြန်မာဘာသာနဲ့ ဒုတိယဘာသာစကား အင်္ဂလိပ်ဘာသာအပြင် တတိယ ဘာသာစကားတစ်ခုကို သင်ဖို့ စိတ်ကူးရှိခဲ့တာ နှစ်အတော်ကြာခဲ့ပါပြီ။

ဘာဘာသာစကားသင်ရမလဲ စဉ်းစားနေတာ တစ်ကြောင်း၊ အချိန်မပေးနိုင်တာ ဒါမှမဟုတ် သင်ပေးမယ့်သူ ရှာမရတာ စတာတွေနဲ့ ကြာနေခဲ့တာပါ။

အရင်က သင်ချင်တာက စပိန်ဘာသာစကားပါ။

စပိန်သီချင်းတွေ နားထောင်ပြီး အဲဒီအသံကို သဘောကျတဲ့အတွက် သင်ချင်ခဲ့တာ။

စပိန်နိုင်ငံကို သွားဖို့ ရည်ရွယ်ချက် မရှိသလို အဲဒီဘာသာစကားကို တစ်နည်းတစ်ဖုံနဲ့ ပြန်လည်သုံးစွဲချင်စိတ်လည်း မရှိခဲ့ပါဘူး။

ကျွန်မ အမေရိကန်နိုင်ငံမှာ ကျောင်းတက်ခွင့်ရတော့ စပိန်စကားပြောတဲ့သူတွေ အများအပြားကို ကိုယ့်အနားမှာ တွေ့ရမြင်ရပါတယ်။

အဲဒီအခါ သီချင်းထဲကလို မချိုမြဘဲ အတော်လေး ဆူညံတယ်လို့ ခံစားရတာကြောင့် စပိန်ဘာသာကို သင်ယူချင်စိတ် မရှိတော့ပါဘူး။

နောက်တော့ အီတလီဘာသာစကားကို နည်းနည်း စိတ်ဝင်စားခဲ့ပါတယ်။

ဒါပေမဲ့ ပြောသူ အလွန်နည်းတဲ့ ဘာသာစကား ဖြစ်ပြီး ပြန်အသုံးချဖို့လည်း စိတ်ကူး မရှိလှတာကြောင့် ဟိုလှည့်ဒီလှည့်နဲ့ မသင်ဖြစ်ခဲ့ပါဘူး။

ထိုင်းဘာသာစကားကို သင်ချင်စိတ် ဖြစ်ခဲ့တာက ၂၀၁၃လောက်ကတည်းကပါ။

ထိုင်းကို မကြာခဏ ရောက်ဖြစ်နေတဲ့ကာလမို့ တတ်ထားရင်ကောင်းတယ်လို့ ယူဆပြီးသင်ချင်ခဲ့ပေမယ့် အဲဒီအချိန်မှာ သင်တန်းတွေ ဆရာတွေ ရှာမရခဲ့ပါဘူး။

၂၀၀၇ ဝန်းကျင်က ထိုင်းကို ခဏရောက်ခဲ့စဉ် ထိုင်းစကား မတတ်လို့ ထမင်းငတ်ခဲ့ဖူးတာက အမှတ်တရပါပဲ။

အဲဒီအချိန်မှာ သက်သတ်လွတ် စစားဖြစ်နေပြီမို့ သက်သတ်လွတ်ကို ထိုင်းလို မပြောတတ်၊ သွားရလာရတဲ့ နေရာတွေမှာလည်း စကားက မပေါက်၊ အချိန်အတိအကျနဲ့ သွားလာခဲ့ရပြီး ကိုယ့်ဘာသာကိုယ် အစားထွက်စားဖို့ အချိန်လည်း မရခဲ့တာကြောင့် အမှတ်တရ ဖြစ်အောင်ကို ငတ်ခဲ့တာပါ။

ရက်အနည်းငယ်သာနေခဲ့ရလို့ တော်သေးတယ်လို့ ဆိုရမှာပါ။

နောက်ပိုင်းမှာတော့ သက်သတ်လွတ်အစားအစာတွေကို ဘယ်လို မေးရမလဲ အနည်းငယ် သဘောပေါက်သွားခဲ့တာမို့ မငတ်တော့ပါဘူး။

ထိုင်းနိုင်ငံလို သက်သတ်လွတ် စားစရာ ပေါများလှတဲ့ နေရာမှာ စကားမတတ်လို့ ငတ်ခဲ့တာကို မကျေနပ်လို့ စကားကို တတ်အောင် သင်ချင်စိတ်ဝင်သွားခဲ့တာပါ။

မကြာသေးခင်မှာတော့ အွန်လိုင်းပေါ်မှာ ထိုင်းစကားလုံးလေးတွေ တင်ပေးနေတဲ့ ဆရာမလေးတစ်ယောက်ကို စိတ်ဝင်စားပြီး အွန်လိုင်းကနေ ထိုင်းစာနဲ့ စကားကို စသင်ဖြစ်သွားပါတယ်။

အခုအချိန်မှာတော့ ဗျည်း၄၄လုံးနဲ့ သရအနည်းငယ်ကိုပဲ သိပါသေးတယ်။

စကားလုံးတွေကိုလည်း အနည်းငယ်သာ တတ်သေးတာမို့ စကားတော့ မပြောနိုင်သေးပါဘူး။

ကိုယ့်ကိုယ်ကိုယ် သူငယ်တန်းကလေးလို သဘောထားပြီး ထိုင်း ကကြီး ခခွေးကို စသင်နေတယ် ဆိုပါတော့။

အရင်က ဖတ်ဖူးထားခဲ့သလိုပါပဲ။

တတိယဘာသာစကားကို သင်တဲ့အချိန်မှာ ဒုတိယဘာသာစကားက အနည်းငယ် ပိုပြီး လွယ်ကူလာတယ်၊ ပိုသဘောပေါက်လာတယ်လို့ ခံစားရပါတယ်။

တတိယဘာသာစကား စသင်ချိန်လေးကို နောက်ပိုင်းမှာ ပြန်ကြည့်နိုင်ဖို့ အမှတ်တရ ရေးထားတဲ့ ပို့စ်ကလေး ဖြစ်ပါတယ်။

မလှပတဲ့ ကိုယ်ပိုင်လက်ရေးတွေ